Բորմեքենայի փոխարեն

Ֆրանսիայի առողջության ազգային և բժշկական հետազոտությունների ինստիտուտի գիտնականներին հաջողվել է ատամների շաղափելու եզակի մեթոդ ստեղծել առանց բորմեքենա օգտագործելու, որի շնորհիվ ատամանցքերը հնարավոր կլինի բուժել նորագույն դեղերով:

Նրանք ստեղծել են վերականգնող գել և թաղանթ, որոնք կօգնեն վերացնել ցավը և ազատվել ատամնաբույժի մոտ գնալու վախից:

Կարիեսով ատամը վերականգնելու նպատակով կարելի է գել ներմուծել վնասված հատված` վրան ամրացնելով թաղանթի մի կտոր, և ատամի խոռոչը մեկ ամիս անց ինքն իրեն կապաքինվի:

Նման արտասովոր արդյունք ստացվում է հատուկ պեպտիդների` խթանող հորմոնների շնորհիվ, որոնք ավելացվել են նորագույն դեղամիջոցներին: Այս նյութերի ազդեցության ներքո ատամների հյուսվածքների բջիջները սկսում են բազմանալ, որի արդյունքում վնասված հատվածը լավանում է: Ըստ որում, ամենաբարձիթողի դեպքում անգամ որևէ բժշկական միջամտության կարիք չի զգացվում:

Հատկապես պուլպիտի ժամանակ ատամների արմատները մաքրելու բուժգործողության կարիք չի զգացվի: Բացի այդ, ատամնաբույժն այլևս ստիպված չի լինի փոխել արտաքին տեսքն ու ամրությունը կորցրած հին ատամնալիցքը: Իսկ ամենակարևորը, կարելի է վերականգնել դիմացի ատամները` կտրիչները, չվախենալով, որ դրանք կկորցնեն իրենց գույնը:

Ինչպես հաղորդում է «Ռոսբալթը», գիտնականներն առայժմ փորձերը կատարել են միայն մկների վրա, որոնց ատամները նոր դեղանյութերի կիրառումից հետո մեկ ամիս անց ապաքինվել են: Հնարավոր է, որ մարդու համար նման արդյունք ստանալու նպատակով շատ ավելի երկար ժամանակ պահանջվի: Ամեն դեպքում գիտնականները շարունակում են հետազոտությունները:

Գերմանական DMG ընկերությունը 2009թ. վերջերին սպառողներին ներկայացրեց բուժական գելի միջոցով կարիեսի բուժման նոր մեթոդ, որը նույնպես բացառում է բորմեքենայի կիրառումը: Այս մեթոդի շնորհիվ  զտող գելի միջոցով վերանում են ատամի հյուսվածքների բորբոքումները, և ատամն առողջանում է: Բուժման համար պետք չէ ցավազրկող սրսկել և շաղափել ատամը` վնասելով առողջ հյուսվածքները: Այս մեթոդը, սակայն, նախատեսված է միայն կարիեսի նախնական փուլի` ատամի էմալի փոքր վնասվածքի և դրա վրայի պիգմենտային լաքաները վերացնելու համար:   

Հարցեր, պատասխաններ, մեկնաբանություններ